Құрғақ және ылғалды жөтел: айырмашылығы неде? 

Жөтел — тыныс алу жолдарын шырыштан, шаңнан және басқа да

тітіркендіргіштерден тазартуға көмектесетін ағзаның қорғаныш реакциясы. Ол

құрғақ немесе ылғалды болуы

мүмкін. Олардың айырмашылығын түсіну әрі қарай не істеу керектігін анықтау  маңызды. 


Құрғақ жөтел 


Құрғақ жөтел кезінде қақырық бөлінбейді. Ол тамақтың

жыбырлауымен, қышуымен немесе тітіркенуімен қатар жүруі мүмкін. Кейде жөтел

ұстама түрінде пайда болып, түнде, сөйлегенде, күлгенде немесе суық ауамен

тыныстағанда күшейеді. Құрғақ жөтел суық тиюдің бастапқы кезеңінде, аллергия

кезінде немесе тыныс алу жолдары шаңнан не түтіннен тітіркенгенде пайда болуы

мүмкін. Кейде ол бронх демікпесімен, шырыштың жұтқыншақтың артқы қабырғасымен

ағуымен немесе басқа жағдайлармен байланысты болады. 


Ылғалды жөтел 


Ылғалды жөтел кезінде қақырық бөлінеді. Оның көмегімен ағза тыныс алу жолдарын жиналған

шырыштан тазартады. Мұндай жөтел суық тию, бронхит және тыныс алу жүйесінің

басқа аурулары кезінде пайда болуы мүмкін. Алайда қақырықтың түсіне ғана қарап

аурудың себебін анықтау мүмкін емес. Мысалы, сары немесе жасыл қақырық әрдайым

бактериялық инфекцияның бар екенін және антибиотик қабылдау қажет екенін

білдірмейді. 


Үй жағдайында не істеуге болады? 


Жөтел жеңіл болған жағдайда көбірек демалу, жеткілікті сұйықтық ішу және бөлмені үнемі

желдету пайдалы. Жылы сусын тамақтың тітіркенуін азайтуға көмектесуі

мүмкін. Жөтелді басатын және қақырық түсіретін дәрілерді өз бетіңізше қолданбаңыз:

олардың әсері әртүрлі, ал дұрыс таңдалмаған үйлесім тыныс алу жолдарының табиғи

тазаруына кедергі келтіруі мүмкін. Дәрі таңдағанда адамның жасын, басқа

ауруларын және қабылдап жүрген дәрілерін ескеру қажет.


Қашан дәрігерге жүгіну қажет?

Жөтелмен бірге мына белгілер байқалса: 


  • тыныс алудың қиындауы немесе ентігу; 
  • кеуде тұсының ауыруы;
  • қақырықта қанның болуы;
  • қатты әлсіздік; 
  • бірнеше күн бойы сақталатын жоғары дене қызуы; 
  • уақытша жақсарғаннан кейін жағдайдың қайта нашарлауы. 


Жөтел үш аптадан ұзаққа созылса да, дәрігерге қаралған жөн. Кішкентай балаларға, жүкті

әйелдерге, егде жастағы адамдарға және созылмалы аурулары бар науқастарға

маманның кеңесі ертерек қажет болуы мүмкін. Есте сақтаңыз: құрғақ және ылғалды жөтел — жеке диагноз емес, ол симптомдар. Емді дұрыс таңдау

үшін жөтелдің себебін және адамның жалпы жағдайын ескеру қажет.


Материал ақпараттық сипатта берілген және дәрігер кеңесін алмастырмайды. Дәрілік заттарды қолданар алдында

нұсқаулықпен танысып, маманмен кеңесіңіз.